林志堅：頭等大事學好中文
傑志簽得前漢堡港將林志堅，回響一樣堅，傑志項目及公關經理伍怡欣（Jessica）表示，尋日喺傑志中心嘅電話同球會fb，都接到唔少球迷查詢林志堅情況，關注最多嘅係志堅嘅球衣號碼。「受關注度比想像中更高，fb嘅Like數同回應超出平日兩倍，唔少球迷都問佢嘅本地球員身份同代表港隊機會，不過最多嘅係話要印佢件6號波衫，雖然我哋今季預訂新球衣數量已比上季多咗3成，但相信一樣供不應求，志堅嘅球衣銷售肯定會超越以前最好賣嘅盧均宜同佐迪。」傑志新波衫將會喺下月中推出，球迷記得支持啦！
林志堅尋日已經由香港經瑞士轉機返德國，佢一落機就收到無論喺東網同傑志fb嘅球迷反應，受關注度固然高，而且絕大部分都好正面，令佢既意外亦興奮。志堅話稍後返嚟香港除咗要努力訓練同比賽回報球迷外，頭等大事係學好中文同廣東話。因為自己睇得明球迷回應，點都比靠翻譯開心得多，佢笑住話自己擁有堅爸爸良好基因，相信學中文會好快上手。