港超聯大件事！「瑞典呂布」伊巴謙莫域轉戰港超加盟班霸東方？將同巴黎聖日耳門（PSG）約滿嘅「伊巴謙」早前自爆季後離隊，自然成為列強搶手貨，由英超班霸曼聯到曾效力過嘅AC米蘭皆虎視眈眈，就連強勢掘起嘅中超，亦盛傳有土豪球會開出60萬鎊（約660萬港元）周薪利誘。不過點爆都唔及伊巴謙踢港超爆，現居港超榜首嘅東方尋日喺官方fb宣布已同伊巴謙達成加盟協議。消息一出，即有波衫舖喺東方球衣印上伊巴謙中文燙字，霸氣程度直逼現任東方副總監歐偉倫當年加盟曼聯，連費格遜都要爭住同佢握手！
咪住……咁爆嘅消息，點解唔見有外國傳媒報道？心水清嘅讀者已經估到，尋日除咗係亞視熄燈大日子，仲係一年一度愚人節，唔使開估都知咩事喇。作為東方爭標對手嘅傑志亦都唔執輸，搵番前年暑假PSG訪港友賽相片回帶，仲tag住「真伊巴」挑機，一於球場內外鬥餐飽，球迷要準備多幾包花生喇！