黃蜂坐艇 慘吞6連敗

「林瘋」林書豪(J.Lin)昨於黃蜂對快艇之戰正選上陣,代替因傷倦勤的巴頓,雖然佢打到「爆缸」兼攻入全隊最高的26分,可惜其他隊友不爭氣,最終黃蜂以83比97不敵有基斯保羅及列迪克攻入32分的快艇,慘吞6連敗。

巴頓因右腳腳趾有傷,作客快艇未有披甲上陣,林書豪因而得到今季第6次正選的機會。

轟26分勇戰爆鼻

「林瘋」今仗手風甚順,全場16射9中,其中4次外圍起手亦僅射失1次,全場取得全隊最高的26分。他在第4節初獲得一次快攻機會,單人匹馬殺入快艇禁區,在對手5人圍困下上籃得手,不過同時亦被防守球員打中鼻樑,「爆晒缸」仍未獲球證吹罰。

幸好經隊醫治理後,J.Lin可以繼續上場作戰;惟主力得分手甘巴獲加今戰在對手嚴防下,全場只得11分,黃蜂終以14分之大敗,近11次對快艇只贏1場,完全被對手剋死。黃蜂雖吞下6連敗,但林書豪賽後仍對球隊前景感到樂觀:「我哋依家都係想贏一場波,不過比起過去幾場,今場大家都好努力比賽,而且防守時亦多咗出聲互相提點,如果Keep得住咁打,好快就有好事發生。」