今日我想「預言」兩支近期NBA表現最受注目的球隊，一支係衞冕的勇士，另一支係魚腩部隊76人，首先要講的是勇士，昨天觀看他們對鳳凰城太陽的賽事，最終贏波造出繼續破紀錄的17連勝，無獨有偶，76人昨天面對火箭，在「大鬍子」占士夏登攻入50分之下，僅以兩分之差落敗，造出17連敗，一支球隊開季未輸過，另一支就開季未贏過。
勇士今季在史堤芬居里技術更上一層樓，三分球射到破晒紀錄下造出開季17連勝，縱使主帥卡爾昨仗因腰傷未能領軍，但在年輕助教禾頓帶領下繼續保持強勢，面對同樣不打防守全力進攻的鳳凰城，鳳凰城最終大敗一仗，而勇士則轟入22個三分球，這場波標誌同勇士鬥攻只有死路一條，想贏勇士一定要攻守兼備，勇士會於12月26日Boxing Day主場迎戰騎士，這場上季總決賽翻版，我認為騎士有力終止勇士的連勝。至於勇士能否挑戰公牛的72勝紀錄，只要陣中球員能夠保持健康，相信可以追平甚至破紀錄。
魚腩球隊76人自開季已經連輸17場，但球迷其實不用驚訝，因為76人球員今季整體薪酬大約3,000萬美元，在聯盟平均每隊達6,600萬美元下，偏低的薪酬自然請不到好球員。76人今季的企圖明顯想藉較低排名，可在明年選秀抽到好球員，以球隊現時的陣容及打法，如果今季贏到10場已經好好。