寶釵撼親頭，照計孖生家姐Beatrice應該好緊張，不過Beatrice似乎「發仔瘟」，掛住去睇「殺女王」尼馬，喺美國代表巴西對哥斯達黎加嘅熱身賽，賽後仲送上門錫尼馬臉珠，又喺Instagram公開「錫錫」相。喂，有冇咁Sweet呀？
巴西前日喺新澤西州友賽哥斯達黎加，尼馬喺尾段10分鐘先有得落場，賽後仲詐晒型話唔習慣做後備，不過有「女」萬事足嘅尼馬心情好快靚番，事關一名金髮索女主動送上門，佢就係加拿大網壇新星寶釵嘅孖生姐姐Beatrice！呢位靚女原本係為出戰美網嘅妹妹打氣，點知轉頭走咗去睇尼馬。
有靚女主動埋身，尼馬當然唔會抗拒，兩人一見面就親密合照，Beatrice尋日仲喺Instagram公開錫尼馬臉珠嘅相，嗒晒糖留言：「佢係全世界最可愛嘅人！」尼馬亦回禮貼相讚Beatrice係「巴西幸運女神。」唔知巴西聽朝同美國隊踢熱身賽，Beatrice會唔會再入場為尼馬打氣呢？（周三早上8時開賽、馬會網上文字直播）
查實尼馬依家唔應該咁風騷，事關佢個青梅竹馬死黨盧卡斯基斯賓，前日喺巴甲為祖恩維爾作客帕拉尼恩斯一仗，同對手爭頂頭部受重擊，即場昏迷要救護車緊急送院搶救。21歲嘅盧卡斯基斯賓曾經同尼馬至愛錫嘅妹妹Rafaella拍過4年半拖，直到上年先至分手。