冇拖拍 有兩個女神
混血兒零舍靚！港德混血兒林志堅都唔例外，外型英俊瀟灑，加上喺球場馳騁嘅英姿，肯定迷到萬千少女，當記者問到佢今次點解唔同女友一齊返嚟嘅時候，佢表情靦腆，話已經年幾冇拍拖，依家係單身宅男，令記者錯愕不已。
志堅話感情事順其自然，當問到佢擇偶條件，佢但笑不語，不過佢話心目中一直有兩個夢中情人，分別係美國女演員兼唱作人 Ariana Grande，同埋南非超級名模 Candice Swanepoel。林爸爸話志堅喺德國生活健康簡樸，滴酒不沾，除咗練波比賽，最多都係同隊友朋友食餐飯吹吓水，其餘時間喺屋企做宅男，上網打機消磨時間，將更多精力專注喺足球事業。
將遊法國期待艷遇
不過，林志堅並唔抗拒談戀愛，嚟緊星期日佢隻身飛返德國後，會會合一班隊友同朋友，一齊去法國旅行，佢仲笑笑口話巴黎既然係浪漫之都，話唔定有艷遇都未定喎！