勇士登頂奪太平洋組冠軍
拿殊退役，好彩仲有「新拿殊」接棒！自從2009年踏足NBA前，効力金州勇士嘅史堤芬居里已被視為拿殊接班人，與拿殊同樣身材唔算高、但勝在傳得兼射得嘅「咖喱仔」居里，昨日憑勁爆演出俘虜敵對球迷，並帶領勇士作客以122比108擊敗拓荒者，自1976年來首奪太平洋組冠軍。
現任勇士主帥卡爾昔日喺太陽教練團工作時，已經開始留意居里喺大學賽嘅表現，縱然太陽當年未能透過選秀會揀中居里，打造「雙拿殊」組合，慶幸輾轉間仍能指導愛將。居里今季喺卡爾教導下打出代表作，昨日喪入5個三分波，貢獻全隊最高嘅33分及10次助攻，勇士愈打愈順之下將比賽拉開，終以14分大勝，更厲害就連拓荒者球迷都被俘虜，於比賽末段向居里狂嗌「MVP」致敬。弗到震嘅勇士已經連贏7場，時隔39年再次喺太平洋組封王之外，佢哋只要再贏一場便可追平球會於75至76球季創下嘅單季最多勝仗紀錄（59勝）。
「德國槍」破紀錄喜上加喜
尋日仲有一場焦點賽事，就係德州打吡；小牛球星艾利斯然獨取38分帶領球隊主場勝馬刺101比94，但點都唔及隊友魯域斯基搶鏡。剛於周一再為人父嘅「德國槍」今場波攻入15分並拉下13個籃板，成為NBA史上首位累積25,000分、10,000個籃板、1,000次封阻及射入1,000個三分球嘅球員，啱啱出世喺細仔阿Max果然好腳頭喎！
