Sporty Girls 泰好揪!
東網電視體育台製作嘅傑志特約節目《傑志情報站》，第二集今日有得睇啦！「末代港甲」冠軍傑志，聽日(10日)就會喺泰國出戰球會史上第一場亞冠盃資格賽，對手就係泰超勁旅春武里，為咗今場硬仗，傑志上下都準備充足，務求可以逢關過關，如願取得亞冠盃分組賽嘅入場券。
傑志大軍除咗喺主帥摩連拿率領下，積極進行不同戰術嘅練習外，幾名主將包括中場林嘉緯、後衞列斯奧、曾至孝，同埋龍門王振鵬，就喺體育台兩位Sporty Girls、靚女主持Iris同Cathy穿針引線下，去到由港產世界泰拳冠軍向柏榮師傅主理，位於灣仔嘅Bomber Gym，進行泰拳特訓。「向師傅」仲叫埋首席女弟子、現任香港泰拳54公斤級女拳王Nana曾海蘭，幫手操傑志4子同2位Sporty Girls。雖然係速成班，但過程絕對「冇血有汗」，各位傑志嘅球迷， 一定要捧場啦！
Cathy
介紹：無論喺中學定大學，都係學校籃球代表隊成員嘅佢，籃球場外溫文有禮、陰聲細氣，十足鄰家小女孩般可愛；籃球場內卻戰神上身、孔武有力，唔講以為係男人嚟！雖然睇本地波日子尚短，但係就非常欣賞亞協盃神射手巴倫古素嘅射術，同埋覺得主教練摩連拿充滿拉丁成熟男士嘅魅力。
Iris
介紹：人稱「勁抽妹」嘅佢百足咁多爪，入行未夠一年，已經見過無數大場面，包括上年去到世界盃主辦國巴西採訪，啱啱仲去完英國親身體驗連場英超大戰。本身係籃球健將嘅佢，亦十分鍾意睇本地波，傑志球員中最Like中場林嘉緯，除咗因為佢好波，最主要大家都係愛狗之人。
