莎賓娜47吋長腿考起售貨員

哈薩克排球女神莎賓娜BB6日5夜嘅訪港行程接近尾聲,在奧海城同兩位型男鄭嘉穎及胡鴻鈞參加完元旦倒數活動後,昨日把握最後機會全力衝刺,先後到奧海城等大型商場瘋狂購物,但係莎賓娜「十二頭身」及47吋長腿考起班Sales,反轉幾間商場去摷適合尺碼嘅衫褲。

莎賓娜除夕夜到了奧海城出席倒數活動,同場仲有鄭嘉穎同胡鴻鈞等藝人。莎賓娜先用半鹹淡廣東話同粉絲講「大家好」,之後大談訪港期間有購物買新褸,不過就冇計過使咗幾多錢,佢亦非常為食,自爆有食海鮮,仲大讚香港seafood好好味。

問到香港同哈薩克除夕有乜分別,莎賓娜話其實慶祝方式相似,她說:「在祖家會同親朋戚友過,仲會親自落廚,最拿手就係整朱古力批!」莎賓娜又大讚香港男仔好可愛,不過現階段只會專注打排球!

除夕派對同鄭嘉穎手拖手

除夕派對大會安排鄭嘉穎同胡鴻鈞整窩夫畀莎賓娜食,鄭嘉穎用cream唧咗個心形出嚟,氹得莎賓娜勁開心,仲做埋招牌心形動作,莎賓娜同鄭嘉穎台上玩遊戲期間手拖手,唔單止面都紅晒,仲要玩埋自拍,似乎有啲過電!

元旦日莎賓娜在媽咪及教練陪同下,走訪多個大型商場「血拼」,身型極靚嘅佢想買條牛仔褲,但試問邊有咁多人擁有47吋長腿咁靚先?結果試過好多條褲,佢一着上身就變「吊腳褲」,呢方面真係冇人幫到佢,長腿美女今日將會搭早機告別香江,女神再見啦!