貴為南韓花滑「天之驕女」金妍兒迷倒唔少男粉，但勢估唔到綁唔住冰球男友個心！冬奧痛失金牌嘅佢，原來諗住退役就可以體會吓「平凡人嘅幸福」，點知另一半竟然多次偷食，「女王」終於憤然提出分手，慘變「雙失冰后」。
金妍兒早喺2010年就讀高麗大學已經認識冰球國手金元中，兩人2012年2月重逢後撻着，直到今年3月畀狗仔隊拍到深夜約會先公開戀情，可惜好景不常，金元中6月底被踢爆走去色情按摩店Happy，又同隊友加埋幾個女子喺首爾夜店通宵狂歡，「女王」知道後嬲到爆，毅然飛甩個「負心男」！不過亦有傳「廣告模特兒好感度」仲勁過全智賢嘅金妍兒係為咗「錢途」，回復單身冧贊助商至斬斷情絲。