體壇「幸福男」祖高域贏完溫網就同大肚女友Jelena拉埋天窗，11月榮升做老竇冇耐，更加登上年終「一哥」寶座兼實現年終賽三連冠，囝囝認真好腳頭。
另邊廂瑞士「球王」費達拿亦好令人羨慕，今季彈番上世界No.2，6月又喜添一對孖仔，加埋對孖女湊足兩個「好」字，上個月更首奪台維斯盃冠軍，家庭事業兩得意，搞到英國「天才」梅萊急急宣布訂婚，出年結束9年愛情長跑娶女友莎絲過門。相比之下，西班牙「野獸」拿度就運滯得多，雖然9奪法網寫下歷史，弊在下半季長期傷病，入廠割完盲腸醫背脊……睇嚟「野獸」都要諗諗同女友Xisca早日成親，沖喜吓喇！