塞爾維亞網球「一姐」伊雲娜域樣靚身材正，出道以來溝仔無數緋聞不絕，男友個個有番咁上下名氣，「娜姐」今年更搭上世界盃冠軍功臣、德國國家足球隊隊長「小豬」舒韋恩史迪加，都咪話唔巴閉！
惹火尤物伊雲娜域先後同過「行家」華達斯高、羅伯度行埋，亦試過玩過界同高球帥哥史葛拍拖，不過點都估唔到竟與大纜都扯唔埋嘅「小豬」撻得着！話說舒韋恩史迪加8月30歲牛一，女友莎拉冇喺生日P出現，傳媒已經覺得事有蹺蹊，之後伊雲娜域接受「冰桶挑戰」點名叫「小豬」找數更加有蠱惑，直到9月中德國《圖片報》登咗兩張佢兩個喺紐約十指緊扣嘅行街相，「娜豬戀」正式曝光！
新聞通天後唔少網友都覺得九唔搭八，其實「玩家」伊雲娜域冇段情長久，大家即管睇吓「娜豬戀」玩得幾耐囉！