八卦情場 體得爽
體壇明星昔日的「情感禁區」在新世代往往變成新聞頭條，2014年也爆出多宗令Fans意想不到的戀事，最估佢唔到的是劉翔失驚無神結婚「做老襯」；而中韓兩大飛魚孫楊及朴泰桓，於仁川亞運「基情」滿瀉，幕幕精彩好睇過爭金牌；至於麥艾萊悔婚，玩殘「禾琪」好冇陰功；仲有伊雲娜域搭上「小豬」、菲比斯同雙性阿姨有路、孫延在想嗒「泳壇李敏鎬」，都是今年八卦新聞之最。
劉翔忽然做老襯最轟動
中國「欄王」劉翔近兩年長期養傷做隱士，直到今年9月初，網上瘋傳佢同一名女子去登記結婚嘅相片，「劉天王」翌日就喺微博公開戀情，隨後劉家兩老證實乖仔已娶女演員葛天為妻，消息轟動中外，不過「翔迷」就似乎唔太Like負面新聞多多嘅「翔嫂」！
24歲的葛天畢業於中央戲劇學院表演系，參演過電視劇《重案六組》、《青春大爆炸》等，老竇葛學進係某航空公司前總裁。據講葛天讀大一嗰陣已經住高檔公寓，又不時喺社交網晒名牌炫富，畀同學懷疑佢被人包養。另外亦有傳「翔嫂」報細年齡，出現26同31歲兩個版本，更大鑊嘅係，被指個樣似荷里活「女神」安祖蓮娜祖莉嘅佢，傳聞曾經整容，畀人拎番舊相出嚟做對比之下判若兩人。其實31歲嘅劉翔成家立室理應可喜可賀，弊在唔少「翔迷」都唔睇好呢段婚姻，不過「劉天王」一於少理，仲話會同老婆「努力造人」！
麥艾萊禾琪訂婚變掟煲
愛得高調、「掟」得轟烈！北愛高球明星麥艾萊同丹麥網球「甜心」禾絲妮雅琪，5個月內由訂婚變掟煲！2014年元旦，「禾琪」就喺社交網公告天下答應咗「鬈毛」求婚，殊不知麥艾萊喺5月單方面宣布「分」訊。慘被玩死嘅「禾琪」後來爆料，有日收到麥艾萊電話講分手，唔夠3分鐘就收線，最騎呢係之前一日，「鬈毛」仲講緊有幾咁愛自己，搞到「禾琪」初時以為佢講笑！
諷刺的是，「鬈毛」撇甩「禾琪」即刻行大運，盛傳極速搭上愛爾蘭女模，連贏英國公開賽同PGA錦標賽兩大滿貫；難得「禾琪」亦夠堅強，喺伊斯坦堡破錦標荒，又攞美網亞軍，撫平失戀傷痛，場外單身生活愈見精彩，年底更完成紐約馬拉松壯舉，用行動證明「活得比你好」！
孫楊朴泰桓 愈游愈有「基」
中國「野孩子」孫楊同南韓「海洋男孩」朴泰桓係泳壇宿敵，喺場上鬥個你死我活，中韓兩地傳媒更不時製造火藥味話題，令外界誤以為佢兩個真係仇人，查實「孫朴」由細識到大，私底下Friend過打Band，今屆仁川亞運兩人更大晒「恩愛」！
「孫楊vs朴泰桓」被視為亞運世紀大戰，點知朴泰桓狀態跌Watt完全冇得揮，但佢同孫楊「基情互動」更令人關注。「桓桓」喺200自、400自決賽後輕摸「楊楊」頭頂同下巴，4x100自接力領獎嗰陣又攬到實，去到游泳煞科日果然掀起高潮，孫楊贏完1500自即場幫「桓桓」慶生，親手送上寫咗「泰桓！生日快樂！」嘅生日蛋糕同「情書」，仲將蛋糕啲Cream抹落「桓桓」塊面，打情罵俏……簡直係亞運最難忘畫面！
孫楊上個月被翻舊帳，原來早喺5月全國賽藥檢肥佬，即時停賽3個月，又一次做醜聞主角，唔知「桓桓」會唔會越洋送上安慰呢？