搞寸雷神復出Party
「一眉道人」安東尼戴維斯搞寸「KD」杜蘭特復出Party！雷霆王牌杜蘭特季前因右腳骨折，要等到昨晨終於復出，仲交出27分攻入全隊最高得分，不過塘鵝超新星安東尼戴維斯表現亦不遑多讓，全場貢獻25分、10個籃板、6次偷波及4次封阻，MVP級數的演出助球隊於主場以112比104擊敗雷霆，搞到KD未能以贏波慶祝復出。
杜蘭特於10月11日證實右腳骨折，一直處於休養階段。雷霆昨晨在對塘鵝賽前公布KD將會在今戰上陣，後者雖然久疏戰陣，但昨日一戰未見「生銹」，上陣30分鐘18射9中，貢獻了27分。不過，雷霆「孖寶」之一韋斯布克雖然攻入21分，但事實上20射只得6中，而且更有7次失誤。另邊廂，塘鵝的「一眉道人」繼續MVP級數演出，全場貢獻25分、10個籃板、6次偷波及4次封阻，全面打法助塘鵝以8分之差擊敗雷霆，讓KD未能以勝利慶祝復出，並終止了3連敗頹勢。
雖然復出首仗未能獲勝，但KD仍滿意自己的表現：「我有自信可以打得好，雖然狀態唔算最弗，但我覺得今場已經打得唔錯。季中復出好難即時回復最佳水準，但係我會繼續盡力比賽，做好自己本分。」
2015明星賽球衣出爐
另外，聯盟昨日公布今季明星賽東西兩岸的球衣。今季兩隊戰衣返璞歸真，東岸將會穿上白色波衫，西岸就會以黑衫上陣，兩隊球衣都沒印上傳統「East」、「West」字樣，聯盟發言人表示今次用上簡單配色是向今次全明星周末主辦城市紐約致敬。而克里夫蘭市日前證實申辦2018年全明星周末，騎士前鋒勒邦占士昨日回應事件時，笑說在克市舉行明星賽會令自己不知所措，反而不希望在克里夫蘭舉行聯盟每季盛事。球會已經發聲明表示占士只是開玩笑。
