GT盃香港雙子夾擊澳門先生

第61屆澳門大賽車今日展開,兩名「香港驕傲」方駿宇及歐陽若曦(Darryl)都會出戰GT盃,挑戰人稱「澳門先生」莫他拿的霸主地位。首位於F1試車嘅香港車手方駿宇必成車迷風頭躉,Darryl今年座駕化身檸檬茶一樣吸客!除此之外,今年三級方程式將出現31年來首位女車手哥倫比亞嘅哥特倫,以及下季將為F1紅牛二隊上陣嘅荷蘭車手麥斯韋斯塔本,都仲未計賽車女郎,淨係講都咁多焦點,一年一度車壇盛事,車迷冇理由錯過!

方駿宇篤魚蛋食雞蛋仔備戰

突如其來的F1試車機會,令九十後賽車手方駿宇(Adderly)成為香港車壇歷史第一人,即使本年度澳門大賽車報名早已截止,仍然通融這位F1試車手補上出戰今屆澳門GT盃,其實方駿宇平日同普通港人冇分別,喺西班牙試車後,仲專登返咗香港篤魚蛋食雞蛋仔「叉電」備戰,不同的是他有一個F1夢。

方駿宇上月在西班牙巴倫西亞Ricardo Tormo賽道完成測試蘇巴(Sauber)F1車隊的C31戰車,成為歷來首位測試一級方程式賽車的香港賽車運動員,獲得申請FIA超級駕駛執照資格,並造出1分14.885秒的當日最快時間,以0.013秒力壓同場為蓮花車隊試車的應屆歐洲三級方程式冠軍、來自法國的奧干(Esteban Ocon)。

有櫈仔企 酒精敏感話之你

方駿宇還有一個秘密,原來他患有酒精敏感,飲香檳都會出紅疹,這對於一個賽車手而言甚為苦惱,要是打入前三名「企櫈仔」開香檳點算?Adderly笑笑口表示:「為咗大家高興都會照飲,之後周身出紅疹都冇辦法啦。」

歐陽若曦成包檸檬茶剷入跑道

今年初當選香港傑出運動員的賽車手歐陽若曦Darryl,今屆澳門大賽車將會與VLT維他檸檬茶拍住上,其座駕Aston Martin V12 Vantage GT3亦裝扮到成包檸檬茶一樣,力爭澳門GT盃。

Darryl曾3奪澳門GT盃,有「波子王」美譽,多年後再戰GT盃亦由保時捷改駕Aston Martin。近日Darryl勤操體能,為今屆賽事做足準備,他充滿信心表示:「澳門係我主場,今屆更同香港最具代表性品牌合作,令我感到年輕、新鮮和充滿活力,更有動力去爭取好成績。」