大帝闢謠打鑊金
勒邦占士重返母會騎士後表現平平，不少球迷皆認為「大帝」係因為有傷在身而影響狀態。不過，美國著名網上論壇reddit日前爆料話勒邦占士重返騎士後表現不穩嘅原因，皆因停止服用禁藥，但「大帝」昨日於騎士作客金塊的比賽中即刻貢獻22分、11次助攻同7個籃板球，協助球隊以110比101贏波，以表現還擊傳聞。
新總裁嚴打歪風
美國八卦網站《mediatakeout》日前刊登reddit網民嘅文章，內容是質疑勒邦占士季初表現不振嘅原因。作者唔相信「大帝」不穩定嘅狀態與重返騎士壓力大有關，並懷疑主因是停止服用禁藥。這位網名叫bllewe的網民話聯盟上一任總裁史端一向未有大力打擊禁藥，令到「大帝」可以明目張膽地使用類固醇。
不過，當新總裁阿當施華上任後，對任何有可能影響NBA形象嘅醜聞都雷厲風行作出打擊，更主張更嚴格執行藥檢，加強自己作為總裁嘅影響力。文章作者認為阿當施華知道勒邦占士有服食禁藥，所以向後者表明「大帝」將會成為聯盟中最常被檢查嘅球員，迫使其停藥，目的是保護NBA品牌聲譽。
交出雙雙贏金塊
呢篇文章雖然純屬陰謀論，但確實在網上引起熱烈討論。不過，reddit或bllewe未知是否受到外來壓力，昨日已經刪除內容，只係網民討論依然繼續。
至於主角勒邦占士似乎未有受到陰謀論影響，昨日雖然手感依然一般，全場18射只得8中，但仍以22分及11次助攻造出「雙雙」，助騎士以9分之差擊敗主場嘅金塊，終止球隊連續兩場不勝走勢，實行以行動證明自己乃係真材實料。
本報綜合報道