羅馬里奧當選參議員
巴西前「夢幻組合」鋒線，事業、情場得意！羅馬里奧憑打出「反貪」旗號，尋日喺參議院選舉高票當選，「獨狼」大權在手，必定咬實烏煙瘴氣嘅巴西足總，改革森巴足球發展。而「大哨」朗拿度將於明年4月第4度做老襯，喺度假勝地Buzios迎娶女友Paula。
48歲嘅羅馬里奧2010年當選聯邦眾議員，今年佢代表社會黨競選參議院議員，一直炮轟巴西足總、南美足總同國際足協貪污問題嚴重，並多次同巴西候任足總會長迪尼路開火兼對簿公堂，「反貪先鋒」形象鮮明嘅羅馬里奧，最終以63.4%高票擊敗民主黨對手，將同另一當選盟友、前哥連泰斯會長安達斯山齊士盯死巴西足總。不過巴西傳媒隨即踢爆，羅馬里奧原來秘密收取巴西足總贊助商AmBev巨額捐款共50萬雷亞爾（約160萬港元），令人懷疑佢係終極臥底！
大哨第4度做老襯
另外，巴西媒體《UOL》報道，38歲嘅朗拿度將於明年4月同女友Paula拉埋天窗，已經係佢第4次結婚。據報婚禮會係一個為期3日嘅巨型派對，預計會邀請1,000個賓客嚟觀禮。朗拿度3年前喺西班牙結識Paula，希望今次佢可以修成正果啦！