香港「德」粉意忘形

世界盃終極決賽之夜,香港各大商場、酒吧及睇波騷的氣氛依然熱烈到爆,而馬里奧葛斯心口一控一射的金球,就令香港德國足球之友最「德」意忘形,與哭乾眼淚的美斯迷形成強烈對比。

周一凌晨3時開賽的王者戰,港、九、新界多個商場都舉辦睇波騷,萬千粉絲湧到商場歎住冷氣睇波,東九龍至hit「蒲點」觀塘apm商場,更加準備了決賽隊兩國特別美食,包括阿根廷鬆餅,以及德國大肉腸,陪球迷一齊睇波。有德國在港留學生Louisa披上德國國旗、畫「花面貓」隔空打氣,見證德國24年後再捧大力神盃。而幾個穿着波衫的男學生更聯袂睇波,迎接文憑試放榜。

美斯球迷淚未「廷」

至於香港德國足球之友,則在飛龍足球場book場睇直播,逾百球迷帶齊打氣「架生」,連同兩位本地足球評述員劉舜文及強尼,一齊嗌、一齊叫喊,個個玩得過癮,當德國最終捧走獎座,一眾die hard fans的情緒更高漲,相反,在灣仔酒吧睇波的阿根廷香港球迷會,因為球隊最終失守,fans都表現失望,完場後更有女fans當場落淚,而男球迷都擁在一起互相安慰,場面感人。