大菲玩盡孫子兵法

巴西巨星尼馬受傷、隊長堤亞高施華停賽,「森巴兵團」周三凌晨世盃4強鬥德國,唔通就咁玩完?咁又未必,因為領隊史高拉利手上仲有一部《孫子兵法》!「大菲」早於02年韓日世盃,已運用呢部有2500多年歷史嘅中國偉大兵書,率領巴西奪得冠軍,其後執教葡萄牙亦獲得04年歐國盃亞軍及打入06世盃4強,超額完成,都係「孫子」背後發功。巴西今仗人腳不整,兼承受國民期望沉重壓力之下,史高拉利如何令球隊絕處逢生呢,或者佢已經喺書中搵到答案。

「兵者,詭道也」

《孫子兵法》第一篇開首已提出︰「兵者,詭道也。」意思係兵不厭詐,故弄玄虛。尼馬緣盡世盃後,到底邊位隊友會頂替其位置,眾說紛紜,史高拉利乘機放煙幕 ,竟然話有5位人選,包括韋利安、班納特安尼斯奧、路爾斯古斯達禾、拉美利斯、軒歷基阿祖安奴。不過呢5人嘅踢法,甚至位置都唔同,「大菲」此言無非想擾亂德國領隊勒夫視線,令對方摸唔清自己底牌,或者要花更多精力制訂唔同戰術對付巴西。

「知己知彼,百戰不殆」

書中最為人熟悉嘅金句︰「知己知彼,百戰不殆。」史高拉利自然深明箇中道理,肯定用盡方法刺探對手軍情,陣中効力拜仁慕尼黑嘅丹迪,成為佢今仗最重要探子,呢位中堅對於德國一班拜仁隊友,以至其他德甲球員都瞭若指掌,可向「大菲」提供精準軍情。另外,早前有一位叫做泰拔斯奧嘅巴西人,去教舒韋恩史迪加同紐亞跳森巴舞,隨時係史帥派去嘅間諜。

「夫地形者,兵之助也」

打仗要熟悉戰場地形環境,搶有利位置,踢波亦一樣,巴西身為主辦國,國土幅員遼闊,各城市氣候都有分別。巴西避開去「人間煉獄」馬瑙斯,主要喺福塔雷薩同貝洛奧里藏特比賽,今仗比賽地點貝洛奧里藏特米內羅球場係巴西福地,佢哋上年洲際國家盃4強,喺呢個球場戰至尾段入波,擊敗烏拉圭,今屆16強於同一地點以互射12碼淘汰智利,都係獲幸福之神眷顧。

「避其銳氣,擊其惰歸」

講到今場比賽,基於巴西不利因素纏身,德國走勢凌厲,史高拉利應會使出《孫子兵法》嘅「避其銳氣,擊其惰歸。」估計開波初段,唔會同火力強勁嘅德國駁錘,而係等對方銳氣減弱再反擊。尤其係德國上仗開波13分鐘入波領先到尾,巴西更加會穩字行先,唔畀對手先開紀錄。加上運用「故善戰者,立於不敗之地,而不失敵之敗也」理念,改以穩守突擊迎戰,史高拉利一直採用壓迫防反戰術,以佢老謀深算風格,應會靜候機會,給予對手致命一擊。