漢堡征廣州做大騷

世界盃未打完,但歐洲各球會已開始為下季備戰,德甲球隊漢堡選擇訪華,去到廣州集訓,並於今晚同中超豪門廣州恒大(馬會譯FC廣州)踢熱身賽(中德國際足球挑戰賽廣州站)。漢堡上季幾乎降班,吸取教訓後,今夏一早開操,態度非常認真,雲達華治等主力悉數隨隊,應會大打真軍。恒大已稱霸亞洲,自然想一嘗贏歐洲球隊嘅滋味,肯定其球壇地位,乘主場氣勢,亦會主攻求勝,首選入球大。

(有線61及201台周日晚8時直播)

漢堡上季德甲搞到要踢附加賽,先至驚險護級成功,見過鬼自然怕黑,上月中已經開操,並同低組別球隊踢熱身賽,包括以15比0大炒賀斯特1946,對弱隊都去到盡,可見佢哋備戰態度好認真。

由於漢堡好少球員出戰世界盃,今次人腳頗齊整,包括前鋒蘇奧亞、後衞馬素贊臣、因傷落選荷蘭大軍嘅雲達華治、同埋啱啱以850萬歐元由哈化柏林買斷嘅德國年輕射手拉蘇加都有隨隊。雲達華治已經完全康復,佢表明要趁季前熱身賽,盡快操起狀態,迎接新球季。

兩位23號左腳仔鬥法

由於向世界盃讓路,中超休戰咗個半月,恒大近期頻約戰名牌球隊踢熱身,早前同有朗拿甸奴助陣嘅明尼路交手,領先下反輸3比4。雖然恒大敗陣,但表現進取,反映佢哋好想贏世界知名球隊,豎立金漆招牌,相信恒大今場仍會保持主攻踢法。

另外,廣州恒大今次宣傳主題,以陣中意大利中場迪亞文迪同對手雲達華治大鬥法,作為招徠,預料兩位23號左腳仔都會正選上陣,入波唔會少。

Mic少