南美5虎平歷屆最佳紀錄
厄瓜多爾昨晨進行E組出線生死戰，厄國總統更頒令全國提早收工齊齊打氣，可惜佢哋最終只能同法國互交白卷，3戰得4分提早畢業，令南美洲未能完成「出線大滿貫」，但今屆6支南美兵有5隊打入16強，已經追平咗世盃史上最佳紀錄，再加上4支巴西、智利、哥倫比亞同烏拉圭同處上線，至少有一隊可穩入4強，「南美兵團」今屆可謂威到盡！
厄瓜多爾總統科雷亞賽前頒令，除咗醫療服務員、消防員、港口員工同機場人員外，全國可以提前喺當地時間下晝兩點半收工，齊齊睇直播為國家隊打氣。可惜厄瓜多爾昨仗兩次射門中柱，隊長路爾斯華倫西亞又喺下半場被逐，最後以寡敵眾和法國踢成0:0，次席出線資格被同時間以3比0大炒洪都拉斯嘅瑞士搶去。
厄瓜多爾出局雖然令「南美兵團」未能全部躋身16強，但5隊晉級已經追平史上最佳成績，當中巴西、阿根廷同哥倫比亞都係首名出線，烏拉圭喺「死亡D組」踢走兩支歐洲代表意大利及英格蘭，智利就將衞冕嘅西班牙踢返屋企，戰績彪炳。
巴智哥烏上線互撼
現時巴西、智利、哥倫比亞、烏拉圭同處上線，4隊肯定有一支可以入到4強，如果處於下線嘅阿根廷可以順利打入決賽，就會上演時隔64年嘅「南美世盃決賽」，到時班南美躉肯定勁High！