巴洛迪利又成賊仔目標，呢位意大利球星於上周五晚同細佬出街食飯，賊人趁機潛入佢位於Limido Comasco嘅屋企偷竊，巴神失去金飾同名錶，好彩架價值10萬鎊（約130萬港元）嘅保時捷戰車搵得番，咁都冇咁傷！
巴神早前蒲吧時被偷電話，之後捉住小偷打咗對方一身，點知佢話咁快又成賊人目標。據意大利《羅馬體育報》透露，佢屋企貴重物品幾乎被洗劫一空，佢架保時捷都被偷走，最終喺米蘭附近搵番，總算係不幸中之大幸。巴神之後在twitter表示：「我依家好空虛，冇晒心機，但我會為自己所愛嘅人而戰。」佢之後駕車返球會練波，仲上載微笑照，似乎心情好番好多喇！