利物浦輸冠贏錢

紅軍「做老二」賺晒,利迷上街瘋狂慶祝!利物浦雖然未能染指24年嚟首個英超冠軍,但拿仁現場所見利迷對愛隊奪亞已心足,賽後High爆唱歌慶祝,氣氛正到暈!加上英國呢邊有報道指紅軍成為搵錢1哥,獎金連電視轉播收入高達約12.9億港元,意味球隊來季有足夠銀彈增兵,難怪領隊羅渣士同隊長謝拉特雄心不死,賽後豪言下季捧盃﹗

雖然紅軍收咧戰反勝紐卡素2比1,不過曼城另一邊廂輕鬆贏波,紅軍始終未能創奇迹登上英超寶座。但對利迷嚟講,球隊今季已經超額完成,最初目標只係殺入前四,冇人諗到會有爭冠機會,而且去到季尾仲試過11連勝,38場聯賽入咗101球,得球僅差過曼城1球,紅軍呢個「最強亞軍」非常值得球迷驕傲,所以大約幾百名利迷喺煞科戰後紛紛聚集街頭唱歌慶祝,心情High爆,由於人數眾多,搞到利市要出動大批警員維持秩序,期間更有男粉絲天寒地凍剝晒衫慶祝,突破警方封鎖線紮紮跳,真係熱情滿瀉。呢班利迷唱咗廿分鐘歌後就轉移陣地再慶祝,興奮之情簡直同攞冠軍冇分別!

轉播費加獎金12.9億壓曼城

利物浦今季唔單止成績大躍進,踢法亦非常悅目,電視台識播就梗係播紅軍喇!紅軍雖然未能做到首奪英超,不過就做到搵錢1哥,英國《每日郵報》指紅軍今季獎金連電視轉播收入共獲得9,900萬鎊(約12.9億港元),比冠軍曼城仲要多100萬鎊,即係話紅軍有足夠銀彈增兵,對紐卡素擺老烏嘅中堅史卡迪爾,今季入咗4個烏龍球破英超紀錄,睇嚟紅軍首要執執個後防,而賽後領隊羅渣士同隊長謝拉特誓言紅軍下季會捲土重來,表示明天會更好,拿仁同一眾「利粉」梗係撐硬你哋喇!