真正運動員 懂得站起來
我返來喇！不經不覺我已去咗帕斯9日，呢段時間令我體會一樣從來無諗過會發生在自己身上嘅事。今次集訓目標就係打多場友誼賽，檢討一下之前訓練嘅成果！每日都以比賽提升整體戰術與默契，可惜，我第一日打咗兩節就受傷！
本應只是小小拉傷，點知一日之後手（月爭）劇痛，感覺似骨裂！我以前從未諗過自己會傷到打唔到，第二日由於感到有惡化迹象，不過又好想打比賽，於是我去到一間中醫針灸館治療，治理過後先可以活動達20度左右，係！只有20度！所以我不得不做十字軍，第一次在席上睇比賽。
傷患影響被迫做十字軍
我深深咁體會到受傷無得落場嘅滋味，嗰種心酸、手痕、失落感受，就好比碧咸當年世界盃前斷腳咁。我有嘗試去打，不過由於實在太痛關係，真係頂唔到超過5分鐘就要上水，乖乖睇波。不幸中之大幸係今次只屬友誼賽，如果係大賽，真係唔知點算！
運動員受傷在所難免，錯過嘅可能唔只係一個比賽，甚至係一個機會，一個獎牌。今次受傷令我學會放低壓力，同埋點樣從受傷中學習起來再戰。一日係運動員，一日都會遇到呢種情況。今次係一小課，學習如何從傷患站起來，繼續向前，所以我今個星期都要做治療，快好返，快訓練喇！
鍾國樑（Alex）
天生運動狂，前亞運游泳香港隊「水霸王」