林瘋又做火箭英雄
Linsanity（林瘋）再度襲擊籃壇！繼上仗隻手打殘灰熊後，林書豪（Jeremy Lin）昨日又做「第4節先生」，於最後一節獨取10分，率領火箭主場以107比98勇挫塘鵝，關鍵時刻得分率拍得住占士夏登（James Harden）、韋斯布克（Russell Westbrook）及達基斯（Goran Dragic）等名將，認真勁！
末節得分率冠聯盟
林書豪昨仗雖然全場只有10分進帳，但全部均於第4節取得，包括剩餘3分39秒時射入3分球助球隊追到94平手，加上「林瘋」於完場前命中兩記關鍵罰球，直接判了塘鵝死刑，終帶領火箭以9分之差贏波，繼上仗第4節獨取14分砌低灰熊後，再次成為贏波英雄。
一貫謙虛唔敢認叻
環顧整個聯盟，能夠於末節貢獻場均4.5分，而投射及3分球命中率皆超過5成的球員，僅有「大鬍子」夏登、雷霆球星韋斯布克、太陽控衞達基斯及林書豪。不過，J.Lin就未有認叻，賽後貫徹過往謙虛作風表示：「咁樣贏波唔係一個理想嘅劇本，首先我要多謝教練麥希爾（Kevin McHale）對我嘅信任，二來我需要喺頭3節有穩定嘅發揮先可以幫到球隊。」
本報綜合報道