「萬人迷」打扮以穩重為主，深藍色西裝配綠色領帶，領帶上有小狗圖案，凸顯佢溫柔有愛心又童心未泯，Allback髮型配合小量鬚根，穩實中見男人味，加上佢舉止溫文，一出現已經秒殺全場。
咸爺第一次來臨澳門，吸引超過三百名中外傳媒採訪，不過，傳媒要「親近」機會等於零，因為大會佈置一個台畀碧咸同兩名威尼斯人高層坐定定傾偈，個台離記者三十米過外，仲要用欄杆攔住，前面仲有幾名孔武有力嘅保安把守……
訪問最後一個儀式係打手印，當佢準備前先脫去上衣，貼身恤衫隱隱見到佢嘅胸肌，現場女士即刻尖叫，碧咸向台下報以微笑，令人暈得一陣陣！