維特斯郁隊友被雪
東岸弱旅騎士開季之後一直處於「捱打狀態」，早前畀木狼大炒29分後，球隊急急召開會議「救亡」，但係據《今日美國》透露，騎士一眾球員喺會中互相指摘，初則口角，繼而仲大打出手爆發內訌，陣中球星艾榮（Kyrie Irving）事後眼黑黑兼爆鼻骨，而忽然被雪嘅維特斯（Dion Waiters）就被視為「炳」人最大嫌疑犯！
騎士新季繼續沉淪，開季11戰輸足7場。上周六主場不敵山貓一戰時，陣中Icon艾榮仲戴咗個保護面罩落場，右眼被發現瘀黑之餘，就連鼻骨都斷埋，證明內訌開片一事屬堅料。
艾榮眼瘀鼻裂揚晒
其實迎戰山貓之前騎士開咗大會，會後球隊話今季表現突出嘅維特斯患感冒，連續缺席咗對山貓同巫師兩場常規賽，呢位二年生尋日受訪時唔認被雪，強調絕不會郁自己友。不過隨住騎士教練米克布朗（Mike Brown）尋日指維特斯並非必然正選後，美媒已將打艾榮一鑊嘅嫌疑犯鎖定為「惡霸」維特斯。騎士聽朝主場再鬥巫師，維特斯仲有冇得上場成焦點。
（周四早上８時開賽）
另一支問題多多嘅球隊籃網，尋日喺主場以98比108輸畀拓荒者，近6場輸足5場。翻查紀錄，自00至01球季開始，除今季籃網外總共有3支球隊嘅球員年薪衝破1億美元大關，計落就有拓荒者（02-03）、紐約人（04-05、05-06、06-07）及小牛（07-08），當中只得拓荒者及小牛成功躋身季後賽，籃網今季前景確實令「粉絲」擔心。