主場和沙特 國足出線拖住

昨晚亞洲盃外圍賽C組賽事，中國喺主場狂攻不果，只能以0比0賽和小組一哥沙特阿拉伯，由於同組嘅伊拉克作客以2比0擊敗印尼，令國足未能提早出線。國足看守主帥傅博收起上仗贏印尼一錘定音嘅新星武磊，起用郜林出任單箭頭，16分鐘老大哥鄭智長傳過晒頭，後上嘅姜寧突破越位單刀，可惜佢稍為猶豫畀對方趕及解圍，錯失良機。易邊後中國繼續施壓，張琳芃突然放一記冷箭搞到沙特門將「彈琵琶」，姜寧立即再傳畀孫可搶點又被封出，最終互交白卷。