高比喜獲港迷贈雙節棍
NBA巨星高比拜仁（Kobe Bryant）昨展開遠東之旅首站香港，先後踩落旺角波鞋街同埋灣仔修頓室內場與球迷作近距離接觸，期間獲粉絲送上雙節棍，氹得喜歡中國功夫嘅佢「四萬咁口」，之後於專訪中高比自爆視李小龍為偶像，而且學緊截拳道，顯示佢對中國文化都非常Like！
乘私人飛機抵港嘅高比，訪港首站殺落波鞋街，出席贊助商NIKE新舖開張儀式，即使高比遲到，但數百球迷大嗌「Kobe！MVP！Kobe！MVP！」迎接，場面墟冚。高比先與一位專收藏其球鞋系列嘅波鞋發燒友會面，更為後者所提供嘅24對高比波鞋系列專櫃舉行亮燈儀式。之後高比獲數位球迷贈送禮物，當中有球迷特意送贈一支雙節棍，高比收到時非常高興，更主動擁抱呢位「醒目」球迷。
高比其後為醒獅進行點睛儀式，睇得津津有味，似乎對這種中國傳統文化非常感興趣，臨走前更於門口向球迷拋籃球，將現場氣氛推上頂點，不枉有球迷晨早6點嚟霸位。高比其後到修頓室內場為Nike League賽事擔任頒獎嘉賓，頒獎前更勉勵球員們要努力打好籃球，不要輕易放棄。更將一個簽名籃球送畀坐著輪椅的室內硬地滾球香港代表家棟。
由朝玩到晚夜遊花墟
其實高比向來醉心中國武術，更視李小龍為偶像，曾經推出球鞋紀念佢。今年適逢李小龍逝世四十周年，高比在專訪中話：「我最欣賞李小龍夠勇，敢於挑戰改變現狀。」高比仔仲透露自己有學緊截拳道。
昨午乘小輪遊維港，兼上山頂玩樂的高比，晚上意猶未盡，現身花墟街場與fans接觸。
小龍特別版
為向李小龍致敬，高比拜仁球鞋系列曾推出特別版球鞋，採用了李小龍在電影《死亡遊戲》中的黃色Jumpsuit為鞋的主調，上面印上4條血爪痕花紋。