高比8.3旋風襲港
湖人球星高比拜仁（Kobe Bryant）暑假又嚟香港喇！「NIKE Basketball」將邀請旗下球星高比仔、勒邦占士（LeBron James）同埋杜蘭特（Kevin Durant）嚟到中國多個城市，其中香港就係高比旅程嘅首站，呢位湖人球星將喺8月3日到港，4號就去深圳，之後再到西安同埋上海。
高比拜仁以往曾多次訪港，均大受球迷歡迎，至於今次之行雖然主辦單位暫時仍未公布任何具體行程，但據以往慣例，佢好大機會為正在開戰嘅NIKE League擔任嘉賓，到時一班本港年輕球員又要接受佢嚴格嘅訓練嘞！三位球星將分三段時間先後訪華，打頭陣的是雷霆巨星杜蘭特，他於本周六率先登陸上海。
大帝搵老友Dry飲
另外，定於本月底到廣州的勒邦占士，同未婚妻莎雲娜（Savannah Brinson）婚前最後一癲，各有各玩，「大帝」呢個Party卡士夠晒勁，拳王梅韋特同好多體壇猛人都有到場，不過全晚節目內容單調，相當規矩，不外乎跳舞、唱歌、劈酒，去到尾聲先有兩位比堅尼索女出嚟陪「大帝」切蛋糕。相反同樣喺賭城嘅莎雲娜就孖住班好姊妹，舉行告別單身派對，唔單止Deep V上陣，仲請埋舞男助威，驚唔驚未婚夫占士呷醋ｏ架？
至於一直想超越占士唔再做籃壇老二嘅杜蘭特，亦都繼續追隨「大帝」步伐，尋日被踢爆已經向WNBA球星Monica求婚成功。