Hannah下海挑戰Wakeboard
炎炎夏日，玩水消暑當然係最爽，但點玩先夠型夠潮？睇吓一班港、日、韓「型男索女」木村拓哉、文根英、余文樂等都鍾意玩花式滑水（Wakeboard）就知啦！大家唔好以為玩Wakeboard好難，原來即使冇乜運動天分嘅人，只要做啱步驟同埋夠「勇」，一樣滑得似模似樣。唔信？今集《炎夏冷運動》就請咗靚女梓喬（Hannah）落水示範，接受呢個膽量大挑戰，睇吓可唔可以克服自己細膽嘅弱點！
唔夠力反而易上手
今年先踏足娛樂圈嘅Hannah，一直都膽細細，喺鏡頭前錄影都會緊張到甩對白，所以今次要佢「處女滑水」，絕對係訓練膽量嘅好機會。擔任今集教官嘅「滑水達人」Bosco亦話，玩Wakeboard最緊要大膽：「可能大家見玩Wakeboard要拉住隻艇，以為要手瓜起（月展）好有力先可以玩到，但其實啱啱相反，女仔唔夠力先易上手，因為入門嘅『起水』動作，精要之處就係唔好同隻船鬥力，所以唔夠力反而有好處。喺我嘅教學經驗嚟講，女仔只要克服喺水上被高速拉扯嘅恐懼，半個鐘頭內學識應該唔成問題。」
為咗增加呢次挑戰難度，我哋只係畀咗5次機會Hannah試滑，萬一失敗仲有個大懲罰等住佢。之後見Hannah落到水「騰晒雞」個樣，仲不斷嗌「唔好！唔好！好驚呀！」就知道佢有幾細膽。不過，喺連續4次失敗變落湯雞後，最後一次挑戰竟然「起水」成功企得穩……幾秒鐘，最後都係「太驚青」而鬆手跌落水。雖然Hannah只係成功過幾秒，但教練Bosco都話佢好叻女，差少少完成任務，所以決定畀Hannah合格，唔使大懲罰。
體驗變人生座右銘
最終通過考驗嘅Hannah，就話永遠會記住呢一刻：「Bosco同我講只要唔好緊張，照足步驟去做就一定OK！但落到水真係好驚，幾乎唔記得晒要做嘅步驟，試咗兩次失敗之後有諗過放棄，因為覺得一定做唔嚟！好彩最後喺Bosco鼓勵下，終於成功咗幾秒……雖然只係得幾秒，但都證明自己係得嘅。我份人嘅性格就係咁，一直都冇乜信心，遇到少少挫折就想逃避。不過，我知道依家入咗娛樂圈，冇毅力、冇膽量、冇信心就一定會輸，就好似滑水咁，所以我會以今日嘅體驗嚟作為自己嘅座右銘。」
鳴謝：Island Wake（28950022）
圖、文：司徒子文