費格遜完美告別奧脫福

賽前雙方球員列隊歡迎費爵爺入場，全場一片紅海掌聲雷動，向呢位一代宗師致敬，之後佢老人家不斷為在場粉絲簽名。

史高斯掛靴倒數踢正選

呢場不但係費Sir喺奧脫福球場嘅告別派對，亦係宣布季尾掛靴嘅38歲老將史高斯於主場最後一戰，佢獲得正選披甲，開波冇耐「小豌豆」查維亞靴南迪斯接應尹佩斯嘅妙傳勁射，可惜中楣彈出。至39分鐘尹佩斯罰球斬入禁區，史軍守將艾殊利威廉斯卻解圍失誤，益晒「小豌豆」補中打破缺口，場外費Sir笑到見牙唔見眼。

曼聯小球迷高舉紙牌向費格遜致敬。（法新社圖片）

米捷（左）下半場扳平，幾乎搞寸紅魔捧盃派對。

不過易邊後史雲斯箭頭米捷極速扳平，幾乎搞寸Party，好彩87分鐘守將里奧費迪南於角球混戰窩利破網，令到費Sir於奧脫福球場最後一仗贏波兼捧盃。

除了面具，費格遜紀念tee同頸巾一樣熱賣。

臨別在即，曼迷不停向費Sir攞簽名。

至於近期一直盛傳會離隊的朗尼，今次更有人喺twitter爆料話佢同菲爾鍾斯打架，仲受傷需要縫6針，可見情況非常嚴重，更被踢出昨晚對史雲斯嘅大軍名單。雖然英國傳媒無法證實消息真偽，但空穴來風未必無因。朗尼首席射手地位已被尹佩斯取代，今季表現鬱鬱不得志。加上費格遜退休，由昔日喺愛華頓嘅「仇人」莫耶斯接手，朗尼喺紅魔鬼嘅日子肯定難捱，心情躁爆可以理解。若然佢真係同菲爾鍾斯「講手」，相信難逃被處罰，進一步增加被賣走嘅機會。

熱刺挫史篤城歐聯夢未滅

另外英超早場，熱刺作客以2比1反勝下半場十人應戰嘅史篤城，暫以2分反壓踢少場嘅阿仙奴進佔季席，爭前四歐聯入場券仲未絕望。