Peter睇足NBA五十年，有條金科玉律不變，就係冠軍球隊一定要夠板櫈深度，唔可以畀班主力於常規賽打到殘。湖人高比拜仁係勁，拿殊亦有卡士；但班波後備唔夠人，幾個大將早早搏到過晒火位傷晒，喺季後賽首圈遇着馬刺連輸三場，絕非意外戰果。
湖人班波唔夠勁人，高比仔、拿殊幾乎場場搏盡，搞到五勞七傷。Peter一向好理智，如果要投注就會將感情放埋一邊，今圈鬥馬刺都知湖人冇運行，要贏一場都難，所以喺第二、三場都投注馬刺上盤。奉勸大家一句，要博彩就要頭腦清晰，盲目投注愛隊，盞輸死未天光。
歐聯4強首回合兩仗好精彩，德甲雙雄竟大炒西甲「孔明、周瑜」，好多人睇見個比數都呆晒。Peter唔鍾意馬後炮，但經過兩季觀察德甲，從舊年10月已話拜仁慕尼黑有冠軍相，多蒙特亦有力爆冷。
中世紀有民藝復興，現今球壇就有「日耳曼足球復興」，究其原因，可歸出三點。第一係德甲近年融入更多各地外援令聯賽水準提高。第二係德國青訓踏入收成期。第三係德國球壇中人對球賽了解透徹，國內頂級教練研究出整體同全場緊迫踢法，就係剋死巴塞小組足球最佳辦法。世界球壇改朝換代事在必行，德國足球有力繼西班牙之後，開創另一個光輝王朝。
黃興桂