香港女欖誓進軍大球場
「國泰航空/滙豐香港國際七人欖球賽」將會喺今個星期五、六、日在大球場上演，但各位欖球迷唔好忽略喺周五香港足球會舉行嘅「香港女子七人欖球賽」。由於女欖賽盃賽終極戰將移師大球場，各女將均希望能夠喺呢個4萬人場地捧盃而回。
今屆港隊銳意年輕化，陣中分別有丹妮雅、李念殷、娜達莎都係「90後」，但教練簡祖力仍抱有信心：「球隊依家實力平均兼且備戰進度理想，我亦好開心有兩位新隊員鄺秀欣同李念殷加入大家庭，佢哋帶嚟熱情同埋更旺盛訓練氣氛。」經過抽籤後，港隊喺小組賽與日本、加拿大同組，力爭首名出線盃賽四強。
另一方面，香港欖球總會亦推出首個手機應用程式「香港欖球」，將提供如多個國際大型賽事嘅最新消息、傳媒報道、相片及影片。而香港欖球總會更透過呢個App送出60張「國泰航空/滙豐香港國際七人欖球賽2013」門票，慶祝自1952/53年度首個欖球賽季以來至今日60周年誌慶。
女子「七欖」港隊賽程
日期：3月22日(星期五)
時間：8:40am Vs加拿大
10:00am Vs日本
地點：香港足球會
決賽資料
時間：7:40pm
地點：香港大球場