費南迪斯中伏爆缸
「出得嚟行，預咗要還！」曾効力拓荒者及金塊的西班牙球員費南迪斯（Rudy Fernandez）出名麻煩多多，年頭出戰歐洲籃球冠軍聯賽更「種下禍根」，搞到周五凌晨慘遭立陶宛球迷伏擊。這名3分球專家昨晨協助皇家馬德里作客以105比104險勝立陶宛卡奧拿斯後，遭兩名主隊球迷襲擊打到爆缸，皇馬籃球部會長山齊士（Juan Carlos Sanchez）事後作出強烈譴責，要求歐洲籃協嚴懲卡奧拿斯。
轉戰皇馬未收火
2009年曾批評入樽賽造假、2012年倫敦奧運被法國中鋒圖列夫（Ronny Turiaf）撞到成個飛起，費南迪斯去年回歸西班牙籃壇繼續惹火頭。今年1月12日出戰歐聯16強賽時，費南迪斯先請卡奧拿斯中鋒拿連洛域（Ksistof Lavrinovic）「食波餅」，繼而又辱罵對方前鋒贊古拿斯（Paulius Jankunas），事後不但被歐洲籃協罰款3,500歐元（約3.5萬港元），更埋下次循環對賽時被襲的伏線。
皇馬昨晨作客以105比104險勝卡奧拿斯，於歐聯16強賽繼續高踞E組榜首，雖然會方賽前特別聘請一班俄羅斯保鏢為費南迪斯護航，但當該位皇馬球員準備踏上隊巴離開時，突遭兩位球迷上前「拳頭窩面」，費南迪斯隨即應聲倒地兼見紅。據西班牙《世界體育報》透露，涉案球迷為兩兄弟，皆是卡奧拿斯的激進fans，其中一人已被當地警方拘捕。皇馬籃球部會長山齊士事後躁爆地表示：「如果歐洲球隊想吸引NBA球星嚟打波，呢種暴力事件絕對唔可以姑息，歐洲籃協有必要嚴懲卡奧拿斯以儆效尤！」
舊東家金塊7連勝
至於費南迪斯的舊東家金塊，昨日就於主場以107比92擊敗快艇連贏7場，金塊明早主場對住傷兵滿營的木狼可再贏。