熱火爆笑遊白宮
對熱火來說，這是非比尋常的一天，因為他們不僅作為NBA衞冕冠軍造訪白宮，並且獲總統奧巴馬的熱情招待。勒邦占士、韋迪和奧巴馬三人更有不少搞笑和抵死的對答，令整個會面的氣氛異常輕鬆和惹笑。
據《邁阿密哨兵報》報道，美國總統奧巴馬於當地時間周一於白宮接見熱火，所有熱火球員都獲頒授「持續擁軍獎」，以表揚他們球場以外所作出的貢獻。奧巴馬在開場白中首先高度讚賞熱火球員贏得NBA總冠軍，同時盛讚他們球場外的表現，尤其讚揚占士、韋迪和保殊三位在內，一眾熱火已為人父的球員「以身作則」，關心一眾小朋友發放正能量。
奧巴馬：「雖然公牛攞唔到冠軍令我有啲失望，但我發自內心祝賀熱火，你哋值得攞總冠軍。教練，我唔想剝奪你嘅功勞，但好明顯係同我打過波，佢哋先可以贏到杜蘭特同韋斯布克，我諗佢哋今日嚟嘅另一原因係想再同我過兩招。」
占士：「我哋終於嚟到白宮，真係想同阿媽講，媽媽我做到啦！」
奧巴馬：「你想講乜都得，呢度係你地盤！」
韋迪：「我諗起球隊應該仲有一張10日合約，不如簽我哋嘅兄弟奧巴馬啦！」
奧巴馬：「的確，你哋需要一個射手！」
其後，奧巴馬與熱火球員逐一握手，他先誇讚韋迪的波鞋，其後又對米克米拿表示：「你依家睇嚟好好多，不過上季你睇嚟好渣喎！」熱火與奧巴馬整個會面於輕鬆惹笑的氣氛下結束，球隊將於明早轉往紐約布魯克林鬥籃網，以現時狀態應可擊敗對手，讓4.5分捧上盤。（now635周四早上9時直播）