艾榮攬女夜蒲累騎士輸波
【本報綜合報道】騎士狀元艾榮「喜愛夜蒲」已是公開的秘密，早前更於twitter上載一張「攬女」相，差點搞到同巴西女友Natalia Garibotto反面。艾榮及後雖「箍煲」成功，但「夜蒲」性格依然冇改，早前贏波後更與女友帶埋師弟維特斯到酒吧狂歡，真係教壞後輩。
騎士早前於主場擊敗鷹隊後，艾榮顯得興奮莫名，賽後帶埋女友Natalia與師弟維特斯到酒吧狂歡。艾榮進入NBA僅兩年，不過已曾多次被媒體拍到出入夜店，明顯係「喜愛夜蒲」一族。今次帶埋女友Natalia同師弟維特斯去「蒲吧」，仲要後者做電燈泡，明顯係唔想早前「攬女」事件重現，但就有帶壞後輩之嫌。
湖人止血乘勢獵鹿
艾榮「夜蒲」非常開心，但騎士近況就唔多好，繼早前作客不敵金塊後，昨晨轉戰洛杉磯面對六連敗嘅湖人，仍然未有起色。湖人藉住復出嘅杜域侯活貢獻22分和14個籃板球，加上高比拜仁攻入全場最高23分，協助球隊以113比93大勝騎士，湖人踏入2013年初嘗勝利。「紫金兵團」明早續於主場對公鹿，湖人士氣如虹，讓3.5分捧上盤。（now 678周三早上11時30分直播）