韋迪保殊好揪得
據美媒《RealGM》報道，原來韋迪及保殊早於季前就開始「食夜粥」，拜師邁阿密當地著名健身店TERF的創辦人達斯習武。這位全美武術名人堂得主，曾經擔任美國海軍海豹突擊隊教練，今次就以訓練軍人嘅方式「喪操」兩位熱火球星，並從速度、協調、反應、靈活性、力量及平衡總共六方面着手。
近年傷患頻頻嘅「閃電俠」韋迪今季只曾缺陣四場，而保殊投射平均命中率（55.5%）及封阻（1.5次）數據皆屬職業生涯新高，證明習武成效相當顯著。兩位徒弟喺今季NBA表現都脫胎換骨，師傅達斯自然收貨：「其實武術同運動好似，打波成日會畀人撞跌，我唔係教佢哋打架，而係教佢哋點樣仆落地去卸力保護自己。保殊今季改打中鋒，佢嘅體格冇可能操到260磅，但我有方法令佢好似260磅咁強壯，同時又夠靈活性。」
熱火月底訪白宮見奧巴馬
除韋迪及保殊外，「閃電俠」嘅孩子亦有跟隨達斯進行訓練，睇嚟將有唔少人會步呢對熱火雙巨頭後塵，加入習武行列。另外，據《邁阿密先驅報》透露，熱火將於香港時間本月29日造訪白宮，到時將會獲美國總統奧巴馬接見。
本報綜合報道