T-Mac輸畀羅意庭
慘！「T-Mac」麥基迪在中國籃球職業聯賽（CBA）「處女戰」打到識飛咁，攞咗34分、8個籃板同埋9次助攻，但就係「衰收尾」最後攻勢畀人搶截成功，跟手仲要輸埋個3分波，即場「孭鑊」連累青島雙星以92比95輸咗畀福建潯興；更慘嘅係一班「麥蜜（麥基迪女Fans）」，見到偶像打得咁辛苦都要做罪人，喊到濕晒呀！陰功！
今場「T-Mac」首戰除咗成為全球球迷焦點外，更成為香港籃壇焦點，皆因麥基迪嘅對手，正正係有「港籃」羅意庭打正選嘅福建。講番「T-Mac」就真係陰功豬，成隊波好似打佢一個咁，無人幫到手，打到第三節青島落後成12分，都係靠佢着火先追得番上嚟！不過，慘就慘在到完場前92比92平手時青島最後攻勢，真係盲嘅都知又係交畀麥基迪去攻，令到福建嘅周啟新成功搶截，再畀到隊友蓋恩斯「零秒出手」射個3分波搞掂埋，連累到麥基迪首戰即「孭鑊」！