三級方程式大賽一向係澳門格蘭披治重頭戲，今年仲係賽事三十周年紀念，賽會會於星期日舉行一場巡遊紀念呢個重要日子，搵咗三部唔同年代嘅三級方級式（F3）賽車，喺東望洋賽道上巡遊一圈，三架賽車分別係1954年、1983年和2012年的賽車，車迷一定唔可以錯過。
澳門格蘭披治三級方程式一向都被視為一級方程式車手搖籃，今年24位一級方程式車手中，有17位都曾參加過澳門F3。至於首屆澳門格蘭披治三級方程式大賽在1983年舉行，當屆冠軍係巴西傳奇車手冼拿，佢其後成為1988、1990及1991年世界一級方程式錦標賽年度冠軍，其後多位F1總冠軍包括希爾、舒麥加、夏健倫、韋倫紐夫、畢頓、咸美頓及維度爾都曾在澳門東望洋賽道一展身手。
今屆三十周年澳門F3，大熱門係衞冕嘅真卡迪拿，呢名西班牙車手已經勝出本年度歐洲三級方程式巡迴賽總冠軍，佢將會面對英國方程式錦標賽本土冠軍夏菲、日本F3冠軍平川亮及德國ATS三級方程式冠軍瑞典車手艾歷臣嘅挑戰。
至於將會喺東望洋巡遊嘅三部唔同年代嘅F3戰車，分別係1954年嘅Cooper Mk VIII 500 F3、1983年嘅愛快羅密歐Ralt RT3及福士Dallara F312。1954年當時最成功的500cc三級方程式賽車底盤製造商英國公司Cooper製造嘅Mark VIII 500 正統治歐洲賽場，同年澳門舉辦第一格蘭披治大賽車。1983年F3正式空降澳門，當時幾乎每位三級方程式車手都駕駛着一架Ralt RT3底盤嘅賽車，雖然冼拿喺澳門奪冠時駕駛嘅德利車隊Ralt RT3賽車已經不復存在，但貝加嘅賽車仍然被用於參加三級方程式經典賽（F3 Classic），呢架戰車將於三十年後載譽回歸東望洋賽道。至於Dallara Volkswagen F312係今年一月發布嘅新一代三級方程式賽車，將會首次於澳門出現。