新賽季、新球例，其中以NBA總裁史端主張嘅「插水罰則」最多人談論，專家們一致認為罰錢、甚至停賽幾招處分對「奧斯卡影帝級」球星博Foul有一定阻嚇作用，但卻會引起球員與球證爭拗。
喺甲一打滾廿多年嘅蔡芳裕認為，新加嘅「插水罰則」難執行：「第一次插水冇事，之後罰五千美元，屢罰會停賽。對球證嚟講呢個係剎那間嘅判決，衍生出來嘅爭拗會好多，因為進攻犯規同插水只係一線之差。好似魯域斯基呢啲『奧斯卡影帝』被掂吓都大嗌、彈開，不過新例可事後看片，都有阻嚇作用。」
同時，貝可泓支持明星賽變革，例如由美國球員組成夢幻隊，火併齊集聯盟內世界各地外援的世界隊：「冰曲有試過北美對歐洲，或者對俄羅斯嘅系列賽，如果畀我揀，世界隊有加素兄弟、柏加、巴格蘭尼、列比奧等球星組成，對美國一定好睇。」