Hailey無懼萬聖節刑具！
話說尋日我哋嘅NBA「大測試」請來now娛樂台女主播「大隻青」楊柳青玩遊戲，考一考佢做節目主持嘅應變能力，今日就輪到佢嘅好姊妹Hailey C（陳俞希）玩一玩，雖然「大隻青」用齊鐵球鎖鏈、鐮刀，甚至特大蜘蛛等「刑具」（放心！全部都係萬聖節道具），騷擾讀稿中嘅Hailey，但佢仍順利過關！正所謂「有片有真相」，想睇佢兩個嘅爆笑演出，快啲上on.cc啦！
才女勁Buy熱火
模特兒出身嘅Hailey，近年積極轉型，除做電視台娛樂主播外，亦在電台主持財經節目，更有出書教女仔理財之道，成新一代「才女」！不過，咪以為「才女」「斯斯文文，着條西裙」，原來Hailey都相當好動，仲好鍾意睇NBA添！佢就話：「咁多球隊我最鍾意邊隊？梗係衞冕總冠軍嘅熱火啦！熱火上季攞到總冠軍，球隊內有三巨頭勒邦占士、韋迪同保殊，佢哋有幾強相信唔使我多講。更重要係熱火今季搵嚟上季効力塞爾特人嘅雷阿倫加盟，佢有個綽號叫君子劍，意思係佢球風非常優雅，而不太受關注，但經常射入三分球拯救球隊，呢種『實而不華』嘅男士類型，我就最喜歡！熱火有雷阿倫組成四天王，衞冕總冠軍絕對係Easy Job！」
圖／文：司徒子文
服裝提供：adidas