湖人主場對小牛係開鑼日另一場矚目大戰，小牛靈魂魯域斯基剛進行膝部手術，只能在場邊為隊友打氣，而「紫金兵團」今季羅致拿殊及「超人」杜域侯活組成新F4，豪華陣容冠絕聯盟，但王牌高比拜仁就被踢爆連續6日缺席操練，明早想贏波要靠杜域侯活！
（周三早上10時30分開賽）
隨着年紀漸大，高比拜仁的身體亦愈來愈多毛病，打從10月初訓練營展開後，「高比仔」短短1個月內傷3鑊，左腳、右肩及右腳肌肉都有傷，據洛杉磯媒體爆料，這位34歲得分後衞罕有地連續6日缺席操練，難怪好拍檔加素都不太樂觀：「大家都知Kobe幾硬淨，即使受傷都頂硬上，如果開鑼戰佢唔出得，你就知佢隻腳真係痛到行唔郁。」
一旦「小飛俠」缺陣，笑言新球季想改名「鐵甲奇俠」（Iron Man）唔做「超人」的杜域侯活，將孭起攻擊重任，去季罰球命中率僅得49.1%的「超人」季前喪練罰球，助教柏臣更豪言其命中率有望提升到8成。雖然明早對手小牛亦有魯域斯基倦勤，但卡文及布蘭特一對內線實力與經驗兼備，新兵美奧亦有不俗取分能力，季前賽8連敗嘅湖人根本「讓唔起」對手，小牛受讓8.5分下盤玩得過。另外，騎士嘅前季狀元艾榮日前一鋪過「剝晒」4隻智慧牙，但就話可以喺開鑼日出戰鬥巫師。