C朗、法卡奧入球騷掀金靴大戰！皇家馬德里同馬德里體育會喺周一凌晨西甲齊齊奏捷，兩大「神鋒」C朗同法卡奧都有波入，追貼射手榜領先嘅美斯。如今西甲踢咗未夠10輪，呢三大射手嘅入球數同時已達雙位數，對上一次出現咁激烈嘅「金靴爭奪戰」已經係1943-44年球季，認真誇張！
憑C朗同希古恩分別梅開二度，加上荷西卡利祖建功，皇家馬德里作客大勝馬略卡五比○。唔經唔覺，C朗已經連續8場為皇馬士哥，打破自己個人紀錄，《馬卡報》仲指出C朗累積124個入球，成功超越名宿布達堅奴同派利，成為皇馬史上神射手第7位。莫連奴賽後表示：「今季冠軍其實仲有排爭，唔只我哋同巴塞，馬體會一樣有機會。」
另一邊廂，馬體會同日主場三比一贏奧沙辛拿，前鋒法卡奧入波後今季西甲已累積10球，緊貼11球嘅C朗同13球嘅美斯。西甲上一次喺前10輪有3大射手達雙位數入波係1943/44球季，當時由巴塞傳奇射手馬田領銜金靴大戰。為幫綽號「老虎」嘅法卡奧造勢，馬體會拍咗段叫「黃金老虎」嘅宣傳片，見到馬體會主場一帶全部豎立老虎標誌，甚至有老虎路牌！