米蘭雙雄今季有球員交換，AC米蘭嘅卡斯辛奴成功轉投國際米蘭，而AC米蘭就得到柏仙尼加盟。就上述交易，AC米蘭要向國際米蘭邀付750萬歐元(約7250萬港元)。其實球員對調冇乜大問題，但大家都知卡斯辛奴曾經有嚴重心臟問題，足球員生涯幾乎終結。但國際米蘭醫生賓納斯奧話無發覺「壞孩子」心臟有異常之處，相信佢仍可應付高強度賽事。至於柏仙尼亦已抵AC米蘭兼且通過體測，好快就會同傳媒見面。據報柏仙尼揀選伊巴謙莫域着過嘅11號球衣，至於卡斯辛奴會喺9及99號之間作選擇。
喺英超方面，曾經効力過阿仙奴及曼城嘅前鋒艾迪巴約，上季外借到熱刺表現神勇，取得17個入球及11次助攻，為上季英超唯一取得「雙雙」佳績嘅球員，如今終於獲熱刺正式買斷合約，據英國媒體《每日郵報》及《太陽報》透露，轉會費為500萬鎊(約6,100萬港元)。
另外，曼聯透過官方網頁宣布，年僅18歲嘅智利球員安祖路軒歷基斯已取得工作證，未來日子可為曼聯出賽。安祖路軒歷基斯之前効力過智利大學，更曾協助球隊贏得聯賽冠軍，據悉轉會費為400萬鎊（約4,900萬港元）。