杜蘭特贏錢 見人就攬

唔少NBA球星都係賭場豪客，米高佐敦、巴克利賭到出晒名。雷霆前日以77比92輸畀快艇，轉頭杜蘭特就拉隊落賭場搏殺，賭到第二朝清晨5點！據一位在場嘅賭仔於網上討論區爆料，當晚佢正正係同明星賽MVP杜蘭特同枱，仲大讚「KD」份人冇架子，大方合照仲不斷一齊吹水。

韋斯布克係「黑面神」

但賭仔就大彈其餘雷霆球員，當中韋斯布克全程黑面，大後備艾迪治就當眾捲煙仔畀保安趕走。杜蘭特當晚主力玩「War（賭場戰爭）」，玩法相當簡單，就係同莊家一人一張牌鬥大。呢名賭仔話睇見「KD」抽隻「3仔」以為輸硬，點知莊家竟然捽隻「2」返嚟，杜蘭特戲劇性贏錢即刻High爆，攬住賭仔慶祝。

此外，杜蘭特仲有「賽後報告」喺社交網留言：「清早5點離開賭場…贏咗『幾蚊』，總算令我輸波後得到安慰。」另一邊廂，馬刺尋日以112比91大勝續有高比拜仁缺陣嘅湖人，進一步鞏固西岸榜首位置，睇嚟杜蘭特同隊友應將精力放回籃球場，小賭怡情，勿大賭亂性！

本報綜合報道