公牛屠龍率先闖季後賽
恭喜公牛成為第一支殺入季後賽球隊！東岸「一哥」公牛尋日主場對速龍，喺頭三節均落後下，第四節驚濤駭浪下追和，鄧格更於加時最後0.1秒絕殺，以102比101一分之微擊敗速龍，率先取得季後賽資格。
鄧格0.1秒凌空起手絕殺
當時喺加時剩番最後六秒，公牛以100比101落後，球隊開出界外球，屈臣運球直闖籃底起手，被速龍占士莊臣封阻成air ball，鄧格第一時間跳起搶波並立即於0.1秒凌空起手「Beat the buzzer」，球證要睇重播確定入球有效，公牛最終於一分之微贏波，成班球員開心到飛起。
雖然公牛主將戴歷羅斯連續第六仗缺陣，但今仗有鄧格同布沙取得「雙雙」，贏波英雄鄧格貢獻23分及10個籃板球，而布沙更射入全場最高嘅24分，助球隊以總成績40勝10負率先殺入季後賽。