強國即係強國，中國超級足球聯賽的球員及領隊人工，於亞洲已鶴立雞群，無人可比。至於值唔值？日本同南韓一定話唔值囉！
著名《法國足球》雜誌近日公布國際足壇最高薪球員調查，結果顯示，兩位効力中超球會球員，包括上海申花射手安歷卡，以及廣州恒大中場達里奧干卡，成功躋身前二十位，分別位第十四和第十八位。
此結果全面反映現時中超聯賽火熱程度，資金之充裕，實在令人咋舌。畢竟除上述兩人，其餘前廿名球員，均出自歐洲五大聯賽，安歷卡賺千三萬歐元，達里奧干卡亦有一千二百五十萬歐元，計落仲多過拜仁中場列貝利，以及世界第一鋼門保方。
此調查結果當然惹來大量爭論，有口痕友認為好離譜，指安歷卡及達里奧干卡遠離世界級水準，冇可能賺咁高人工。
不過，大家唔好忘記，中國現時係搞商業足球，於商業世界，一個願打一個願捱，只要畀錢嗰位覺得值，就多多錢都唔係貴。近兩日就有一支叫貴州人和球隊，話想用廿五萬鎊周薪，利誘林柏特及里奧費迪南加盟，就算最終唔成事，貴州人和已經賺晒宣傳費，你話幾咁着數呢！
亦有強國網民興奮若狂，話日本、南韓聯賽沒有人榜上有名，今次中國足球終於吐氣揚眉喎！哈，此等網民果然有見地，中國足球早視日、韓為追趕對象，雖然國家隊面對日韓仍係輸多贏少，但球會花錢能力強咁多，都叫威畀人睇，值得各位大力鼓掌o架！