當一個人有利用價值嘅時候，大把人喺身邊幫你揸乾揸盡，好似NBA嘅林書豪，美國、亞洲甚至歐洲，每日排山倒海嘅新聞，「起底組」連細細個嘅相都搵埋出嚟，只欠第一個咬過嘅奶咀未攞出嚟拍賣，無他嘅，人紅就係咁。
相反，當英雄去到末路，境況就完全相反，曾經被捧上天嘅費蘭度托利斯，依家十足過街老鼠，每日不停畀人提醒，幾多幾多分鐘冇入過波，累積嘅負能量足以摧毀整個人，波男都戥佢辛苦。
英格蘭名宿舒利亞早前喺專欄提及，上周聯賽車仔大勝保頓，費托仍然冇料到，舒利亞話佢睇到一個鏡頭令佢好心傷，當時馬達喺邊路捚攞住個波，望一望禁區入面有乜嘢人交，點知見到費托遠遠咁企喺禁區，因為費托已經唔夠膽再射波，所以情願選擇遠離皮球，少做少錯，唔做唔錯。當然，費托本身有好大責任，但其實領隊係最重要，一個好嘅領隊，唔一定係戰術叻，訓練叻，呢啲嘢身邊大把助教可以做，領隊最緊要係調整球員心理及心態，簡單嚟講，可以話係球員嘅心理醫生，呢方面保亞斯似乎並未夠班。
成班球星個個好咁波，使鬼你教踢波咩？如何令到呢班人將自己正能量展現晒出嚟，並且做到球員間互動，大家好齊心去做一件事，就係領隊要做嘅嘢，今次港隊搵咗摩力克返嚟執教，基本班底其實變動唔大，不過成班球員無論操練、比賽時都明顯比以往有信心，所以你話一個好領隊對一支球隊嚟講係幾重要呢！
波男