明星賽雖然曲終人散，但遺留唔少話題畀球迷談論。公牛球星「大力」羅斯被問到出場時點解成個宅男咁棟篤企喺度，而唔配合勒邦占士一齊跳舞娛賓，佢好認真咁話：「我識跳舞，但我唔認為喺明星賽呢個場合跳舞係啱囉！」
其實明星賽一向娛樂性行先，不過戴歷羅斯呢種籃球至上嘅態度確實值得人尊敬，因為佢好清楚，真係要喺籃球場上跳舞，係應該淘汰熱火殺入總決賽，拎埋冠軍先跳都未遲啦。
估唔到一場明星賽又睇到占士喺關鍵時刻腳軟嘅一面，最後1.9秒東岸輸緊兩分，占士竟然選擇傳波，結果被格芬偷波成功，作為對手嘅高比都忍唔住插爆佢：「點解你唔自己射？」
當占士全場轟入36分（已經入咗6個3分波）時，我諗唔到有咩原因佢會選擇交波。好聽一啲叫願意同隊友分享得與失，衰啲講叫唔願孭鑊，學晒唐唐同曾特首卸膊畀老婆啲衰嘢。
或者九把刀可以考慮拍番套「那些年，我該射但不射的最後一秒」，回顧占士職業生涯卸膊嘅場面，「我識射波，但唔係最後一秒嘅時候」。至於韋迪被球迷批評惡意犯規令高比受傷，始終球場如戰場，當對手如魚得水係咁入波，我認同有時候係要用非常手段去還擊。
忠心直說
台灣《美國職籃》專欄作家邱益忠，自初中起不自禁地戀上NBA，對每支球隊有着獨特見解，以風趣幽默形式同你論盡NBA！